Gaskaboddosaš 50% virgi allaskuvlalektorin pedagogihkas – Sámi allaskuvla – Samisk høgskole
Uoppgitt/ ikke identifiserbare Ikke identifiserbare(2 uker siden)
Stillingsbeskrivelse
Published 10-12-2024
Deadline: 01-01-2025
Gaskaboddosaš 50% virgi allaskuvlalektorin pedagogihkas
Bargoviidodat virggis
Sámi allaskuvlla Sámi oahpaheaddjeoahpuid goađis lea rabas gaskaboddosaš virgi allaskuvlalektorin pedagogihkas. SOA-goahti oahpaha boahttevaš oahpaheddjiid lagas ovttasbargguin práksissurggiin. Virggis leat doaimmat erenoamážit vuođđoskuvlaoahpaheaddjeoahpus, muhto sáhttet maid barggut mánáidgárdeoahpaheaddjeoahpus, lassi- ja joatkkaoahpuin.
Bargui gullá earret eará:
* Iešguđet oahpahan-, koordineren-, bagadallan- ja hálddašanbarggut oahpaheaddjeoahpuin, lassi ja joatkkaoahpuin.
* Áŋgiruššat ovdánahttit oahpaheaddjeoahpuid fágabirrasa ja ovddidit kvalitehta oahpahusas, ja čađahit dutkan- ja ovdánahttinbargguid Sámi allaskuvlla strategiijaid mielde.
* Virggehas sáhttá oažžut eará bargguid allaskuvlla fágalaš doaimmaid siskkobealde.
Gelbbolašvuođagáibádusat
* Virgái ohcat olbmo geas lea mastergráda oahpaheaddjeoahpuin dahje pedagogihkas
* Virgái gáibiduvvo buorre gelbbolašvuohta davvisámegielas čálalaččat ja njálmmálaččat, ja galgá hálddašit ovtta skandinávalaš giela.
*Geabbil ja buorit ovttasbargo- ja gulahallanattáldagat.
* Gáibiduvvo hárjáneapmi bargat sihke
iešheanalaččat, ja bargat ovttas kollegaiguin ja fágabirrasiiguin. Persovnnalaš heivvolašvuohta
deattuhuvvo.
* Ovdamunnin jus lea relevánta práksisgelbbolašvuohta skuvllas dahje mánáidgárddis.
* Ovdamunnin jus lea bargohárjáneapmi oahpahusas allaskuvllas dahje universitehtas.
Bálká
Virgi bálkáhuvvo Stáda bálkáregulatiivva mielde.
Bálká mearriduvvo ohcci oahpu ja bargohárjáneami vuođul čuovvovaš virgekoda mielde:
* Allaskuvlalektor virgekoda 1008 – bálká gaskal: 540 500 – 679 700, bálkáceahkki 55 – 69
Bálkkás gesso 2% geatnegahtton divat Stáda penšuvdnakássii
Formála lassigelbbolašvuohta sámegielas unnimustá 60 oahppočuoggá bachelordásis, addá 20 000,- lassibálkán vuođđobálkái vuosttašgeardde virgáibidjamis Sámi allaskuvllas.
Máŋggabealatvuohta ja searvadahttin
Sámi allaskuvla galgá nu bures go vejolaš speadjalastit álbmoga girjáivuođa ja mii ávžžuhit gelbbolaš kandidáhtaid ohcat virgái beroškeahttá sohkabealis, agis, doaibmannávccas dahje kultuvrralaš duogážis. Jus leat gelbbolaš ohccit geat leat doaimmashehttejuvvon, leat guhkit áiggi leamaš eret bargoeallimis, dahje geain lea sisafárrejeaddjiduogáš, de bovdet unnimusat ovtta ohcci guđege joavkkus jearahallamii.
Ávžžuhit ohccit merket bargoportálas jus lea doaimmashehttejupmi, guhkit áiggi jávkan bargoeallimis, dahje lea sisafárrejeaddjiduogáš.
Mearkumat bargoohcciportálas hábmejit vuođu anonymiserejuvvon statistihkkii maid buot stáhtalaš ásahusat raporterejit iežaset jahkeraporttain.
Sámi allaskuvllas lea šiehtadus Ovttastahtti bargoeallima birra, ja deattuha bargodili láhčimis juohke mielbargái.
Oppalaččat
Virgáibidjan dahkko lágaid, šiehtadusaid ja njuolggadusaid ektui mat gustojit bargiide Norgga stáhtas ja allaskuvlasektoris.
Ohccit sáhttet gohččot bargojearahallamii ja doallat geahččalanlogaldallama.
Fárrendoarjja máksojuvvo stáhta njuolggadusaid mielde.
Finnmárkkus lea sierra ortnet geahpedit lohkanloana ja vearrogeahpádus.
Fuomášuhttit ahte dieđut ohcciid birra sáhttet almmuhuvvot vaikko ohcci ieš lea bivdán čihkkot ohcciidlisttus. Ohcci oažžu dieđu dan birra ovdagihtii.
Mii fállat
Virggi mas ovdánahttinvejolašvuođat, viiddis ja máŋggabealat fágabirrasis
– Ođđaáigásaš visttiid
– Máŋggabealat čálgofálaldagaid
– Heivehahtti bargoáiggi
– Buori bargobirrasa mas alla gelbbolaš bargit iešguđetge fágasurggiin
– Ealli sámegielbirrasa guovddáš sámi guovllus Sámi allaskuvlla fágabargiid bargoresurssat juhkkojuvvojit oahpahandoaimmaid, dutkan- ja ovdánahttinbargguid ja hálddašanbargguid gaskka, ulbmilin joksat allaskuvlla fágalaš mihtuid ja alla fágalaš kvalitehta. Dutkan- ja ovdánahttin (DOB)- ja oahpahusáiggi viidodat čuovvu virgekategoriija ja juhkkojuvvo dábálaččat čuovvovaččat:
* Allaskuvlalektorat: 20 % ja 70% oahpahusáigi
* 10% hálddašanáigi buot virgekategoriijain
Ohcan
Ohcan sáddejuvvo elektrovnnalaččat www.jobbnorge.no bokte, oktan daid dokumentašuvnnaguin:
* CV
* Duođaštuvvon oahppo- ja bargoduođaštusat
* Ollislaš listu dieđalaš publikašuvnnain
* Relevánta publikašuvnnat
* Duođaštus pedagogalaš gelbbolašvuođas
* Eará relevántta duođaštusat, omd bargoduođaštusat jna.
* Bivdit du maiddái almmuhit guokte (2) referánssa
Jus lea váttisvuohta deavdit elektrovnnalaš CV:a, de sáhttá váldit oktavuođa Jobbnorge áššebálvalusain e-poasta: support@grade.no dahje riŋget telefovdnii: 75 54 22 20.
Oktavuođadieđut
Eanet dieđuid virggi birra oažžu goahtejođiheaddjis John-Marcus Kuhmunen, epoasta: johnmk@samas.no, tlf. 78 44 84 91
DIVERSE INFO
| Arbeidsgiver | Sámi allaskuvla – Samisk høgskole orgnr: |
|---|---|
| Kort om arbeidsgiver |
Sámi universitehta boahtteáiggi Sápmái – mii ollašuhttá sámi servodagaid máhttodárbbuid. Sámi allaskuvla lea njunuš sámegielat alitoahppo- ja dutkanásahus mii buvttada alladási gelbbolašvuođa mainna ovddida sámi iešmearrideami, guoddevaš ealáhusaid ja servodagaid. Min ásahusas lea miehtasámi perspektiiva, mii fátmmasta ja olaha olles Sámi, buot sámegielaid ja sámi servodagaid. Min luhtte galget buohkat dovdat oadjebasvuođa. Mii dovdat oahpes bálgáid ja seammás ráhkadit ođđa bálgáid amas duovdagiidda. Mii galgat nannet sámi gielaid, árvvuid ja máhttovuođuid, ja nu maiddái sámi servodagaid. Dál mii ohcat du guhte háliidat leat mielde ollašuhttimis min ásahusa mihtuid |
| Webside | http://www.samas.no |
| Bransje | Uoppgitt/ ikke identifiserbare |
| Yrke | Ikke identifiserbare |
| Sted | KAUTOKEINO (Adresse: Hánnoluohkká 45 Postnr: 9520) |
| Stillingstype | Vikariat Deltid Antall stillinger: 1 |
| Sektor | Offentlig |
| Krav | Unknown |
| Tiltredelse | Unknown |
| Søknadsfrist | 01-01-2025 |
